सेप्टेम्बर 1 देखि Apple को नयाँ CEO John Ternus। र त्यसको केही दिनपछि नै उनको पहिलो keynote, जहाँ कम्पनीको पहिलो फोल्डेबल iPhone देखिने अपेक्षा छ।
Apple ले अहिलेसम्म इभेन्टको मिति नै घोषणा गरेको छैन। तर यसपालिको सेप्टेम्बर कार्यक्रम सामान्य वार्षिक iPhone अपडेटभन्दा फरक हुने लगभग पक्का छ — किनभने मञ्चमा उभिने मान्छे नै फरक हुनेछ।
कम्पनीले अप्रिलमै आधिकारिक रूपमा पुष्टि गरिसकेको हो: Tim Cook सेप्टेम्बर 1 देखि executive chairman बन्छन्, र hardware engineering का senior vice president John Ternus कम्पनीको आठौँ CEO बन्नेछन्। अनुमानित मिति मिल्यो भने Ternus ले कुर्सी सम्हालेको हप्ता दिन नबित्दै आफ्नो पहिलो keynote गर्नेछन्। त्यो पनि Apple ले वर्षौंदेखि नल्याएको एउटा फरक आकारको फोनसहित।
इभेन्ट कहिले हुन्छ?
अनुमानको केन्द्रमा सेप्टेम्बर 9, बुधबार छ। तर्क सिधा छ। अमेरिकामा सेप्टेम्बर 7 मा Labor Day विदा पर्छ, र Apple ले सार्वजनिक विदाको भोलिपल्ट पत्रकारलाई यात्रा गराउने चलन राखेको छैन। सेप्टेम्बर 8 पनि सम्भावनाबाट बाहिर छैन, किनभने ऐतिहासिक रूपमा मंगलबार नै Apple को सबैभन्दा प्रिय दिन रहँदै आएको छ।
निम्तो कहिले आउँछ भन्ने कुरा पनि अनुमानयोग्य छ। 2022 यता Apple ले हरेक iPhone इभेन्टको ठ्याक्कै 14 दिनअघि मिति सार्वजनिक गर्दै आएको छ, जसले अगस्ट 26 लाई सबैभन्दा बलियो सम्भावना बनाउँछ। अमेरिकाका Apple retail कर्मचारीलाई सेप्टेम्बरको पहिलो पन्ध्र दिनभित्र हुने कार्यक्रममा खटिन आवेदन खोलिएको खबरले पनि यही समयतालिकालाई बल पुर्याएको छ।
यी सबै अनुमान हुन्, आधिकारिक घोषणा होइन। मिति Apple बाहेक कसैले पुष्टि गर्न सक्दैन।
iPhone 18 Pro र Pro Max — बाहिरबाट उस्तै, भित्रबाट फरक
डिजाइनमा ठूलो परिवर्तन नआउने देखिन्छ। 6.3 इन्च र 6.9 इन्चकै दुई साइज, उही “plateau” क्यामेरा हाउजिङ। तर एउटा दृश्य परिवर्तन भने चर्चामा छ: Face ID को flood illuminator स्क्रिनमुनि सारिने र त्यसले Dynamic Island सानो बनाउने।
भित्री कुरामा A20 Pro चिप सबैभन्दा ठूलो अपग्रेड हो। यो TSMC को पहिलो पुस्ताको 2nm प्रविधिमा बन्ने अनुमान छ। A19 Pro चाहिँ 3nm मा थियो। डिस्प्ले LTPO+ प्रविधिमा जाने र त्यसले ब्याट्री लाइफ लम्ब्याउने भनिएको छ।
क्यामेराको कुरा गर्दा, 48MP मुख्य सेन्सरमा variable aperture आउने चर्चा छ — मतलब लेन्सबाट कति उज्यालो भित्र पस्ने भन्ने कुरा नियन्त्रण गर्न मिल्ने। कागजमा राम्रो सुनिन्छ। तर फोनको सेन्सर सानो हुने भएकाले व्यवहारमा कति फरक पर्छ भन्ने चाहिँ हात लगाएर हेरेपछि मात्रै थाहा हुन्छ।
अनि एउटा फिचर छ जसको हल्ला धेरै छ र नेपालका लागि सबैभन्दा कम अर्थ राख्छ: satellite मार्फत 5G। नयाँ C2 modem ले Wi-Fi वा mobile नेटवर्क नहुँदा पनि satellite बाट ब्राउजिङ गर्न दिने भनिएको छ। यसबाहेक N2 networking चिप, Camera Control बटनको सरलीकरण, र पछाडिको Ceramic Shield मा frosted फिनिस पनि सूचीमा छन्।
रङमा Dark Cherry यसपालिको विशेष रङ बन्ने र Light Blue, Dark Gray, Silver सँगै आउने अनुमान छ। Cosmic Orange र Deep Blue हट्ने भनिएको छ।
Pro Max मा दुई थप कुरा: चिनियाँ नियामक डाटाबेसको कागजातमा आधारित रिपोर्टअनुसार ब्याट्री iPhone 17 Pro Max भन्दा करिब 10% ठूलो हुनेछ, र फोन आफैँ केही बाक्लो हुनेछ। जोड्नैपर्ने कुरा, यी सबै leak हुन्, Apple ले एउटै फिचर पुष्टि गरेको छैन।
फोल्डेबल iPhone: सबैभन्दा ठूलो कुरा
यही नै इभेन्टको मुख्य आकर्षण हो। नाम अझै अनिश्चित छ — “iPhone Fold” काम चलाउने नाम हो भने “iPhone Ultra” धेरैको अनुमान।
बन्द हुँदा करिब 5.5 इन्च, खुल्दा करिब 7.8 इन्च। iPad जस्तै 4:3 अनुपात, अर्थात् खोल्दा iPad mini चलाएजस्तै अनुभव। Apple ले crease अर्थात् बीचको खोँच लगभग नदेखिने बनाएको दाबी गर्ने रिपोर्टहरू छन्। यही समस्या सुल्झाउन नसकेरै कम्पनी यति वर्ष पर्खिबसेको थियो।
सम्झौता पनि छन्, र सानातिना छैनन्। फोन यति पातलो छ कि TrueDepth क्यामेरा अटाउँदैन, त्यसैले Face ID हैन Touch ID आउने भनिएको छ। पछाडि तीन होइन, दुई वटा मात्रै क्यामेरा। A20 चिप र दोहोरो ब्याट्री भने हुने अनुमान छ।
मूल्य? विश्लेषकहरूको साझा अनुमान $2,000 भन्दा माथि, र कतिपयले $2,500 सम्म पुग्न सक्ने भनेका छन्। यो Apple को अहिलेसम्मकै महँगो iPhone हुनेछ। उत्पादनमा समस्या आएको हल्ला पनि छ, त्यसैले सेप्टेम्बरमा देखाएर बिक्री भने अक्टोबरतिर सुरु हुने सम्भावनालाई पनि नकार्न सकिँदैन।
मूल्य बढ्ने पक्का, कति भन्नेमा विवाद
यो वर्षको सबैभन्दा असहज खबर यही हो। AI डाटा सेन्टरको होडबाजीले DRAM र NAND मेमोरीको मूल्य आकाशिएको छ, र 2nm चिप आफैँ महँगो छ।
तर कति बढ्छ भन्नेमा अनुमानकर्ताहरू नै बाझिएका छन्। एकथरीले Mac र iPad मा भएजस्तै $100 देखि $200 सम्मको वृद्धि हुने भनेका छन्। अर्कोथरी विश्लेषणले $200 देखि $300 सम्म भन्छ — त्यो हो भने iPhone 18 Pro को सुरुवाती मूल्य $1,399 सम्म पुग्छ, जबकि iPhone 17 Pro $1,099 मा सुरु हुन्छ।
यी सबै बाहिरी अनुमान हुन्। Apple ले मूल्यबारे अहिलेसम्म एक शब्द बोलेको छैन।
AirPods, Apple Watch र बाँकी
क्यामेरा भएको AirPods, जसको सम्भावित नाम “AirPods Ultra” हो, यही इभेन्टमा देखिन सक्ने रिपोर्टहरू आएका छन्। दुवै बडमा साना infrared क्यामेरा राखिने र ती मूलतः Siri का आँखा बन्ने भनिएको छ, जसले वरिपरिको कुरा चिन्न सक्ने Visual Intelligence लाई काम लगाउँछ। क्यामेरा चलिरहेको बेला संकेत गर्न सानो LED बत्ती पनि हुने भनिएको छ।
यहाँ अलमल छ भन्ने कुरा लुकाउनुहुँदैन। Apple भित्र यस्ता दुई वटा मोडेल समानान्तर रूपमा बनिरहेका छन् भन्ने रिपोर्ट छ, र एउटा 2027 सम्म सर्ने भनिएको छ। यसपालि आउँछ नै भन्ने ग्यारेन्टी छैन।
Apple Watch तर्फ चाहिँ इमानदारीपूर्वक भन्दा उत्साहजनक केही छैन। Series 12 मा डिजाइन उही, छिटो S-series चिप, केही स्वास्थ्य फिचरमा सुधार र सम्भवतः ठूलो ब्याट्री। Ultra 4 मा पनि उही चिप अपग्रेड। यसपालि Apple Watch SE अपडेट नहुने बताइएको छ।
घरका उपकरणहरू (नयाँ home hub, Apple TV 4K, HomePod mini) सेप्टेम्बरमै आउँछन् भन्ने पक्का छैन। यी अक्टोबर वा नोभेम्बरको छुट्टै कार्यक्रममा सर्न सक्छन्।
जुन फोन आउँदैन
यो वर्षदेखि Apple ले iPhone को लाइनअप दुई भागमा छुट्याउँदैछ। सेप्टेम्बरमा महँगा मोडेल मात्रै — साधारण iPhone 18, सस्तो iPhone 18e र iPhone Air 2 चाहिँ 2027 को वसन्तसम्म पर्खनुपर्नेछ।
नेपालको बजारको हिसाबले यो सानो कुरा होइन। यहाँ सबैभन्दा बढी बिक्री हुने iPhone प्राय: base मोडेल र अघिल्लो पुस्ताका फोन हुन्, Pro Max होइन। ती यसपालि सेप्टेम्बरमा आउँदैनन्।
नेपाललाई के असर?
सबैभन्दा पहिले पैसाको कुरा गरौँ। अहिले अधिकृत रिसेलरको सूचीमा iPhone 17 Pro को मूल्य NPR 236,899 र iPhone 17 Pro Max को NPR 257,999 छ (256GB, cashback लागू नगरेको सूची मूल्य)। अमेरिकामा यिनै फोन क्रमशः $1,099 र $1,199 मा सुरु हुन्छन्। दुवैको अनुपात लगभग उस्तै आउँछ — प्रति डलर करिब NPR 215।
त्यही अनुपात यसपालि पनि कायम रह्यो र माथि चर्चा गरिएको मूल्यवृद्धि साँच्चै भयो भने, iPhone 18 Pro नेपालमा मोटामोटी NPR 2.6 लाखदेखि 3 लाखको दायरामा पर्न सक्छ। फोल्डेबल मोडेल चाहिँ NPR 4.3 लाखभन्दा माथि। यो हाम्रो आफ्नै अनुमान हो, कुनै आधिकारिक अंक होइन — भन्सार दर, कर र वितरकको मार्जिन फेरियो भने हिसाब पनि फेरिन्छ।
पैसा जुटाए पनि फोन हातमा पर्न भने समय लाग्छ। नेपालमा Apple को आफ्नै स्टोर छैन; Oliz Store, Evo Store र Joy Store अधिकृत रिसेलर हुन्। विगतको चलन हेर्दा विश्व बजारमा आएको केही हप्तापछि मात्रै फोन यहाँ भित्रिन्छ, त्यसैले सेप्टेम्बरमा घोषणा भयो भन्दैमा दसैंअघि किन्न पाइहालिन्छ भन्ने होइन।
अनि satellite 5G को कुरा त झन्डै ठट्टाजस्तै लाग्छ। नेपालमा अझै 5G को व्यावसायिक सेवा नै सुरु भएको छैन। NTA ले spectrum लिलामको तयारी गरिरहेको छ र सरकारले आगामी आर्थिक वर्षभित्र व्यावसायिक 5G सुरु गर्ने योजना सुनाएको छ। जुन फिचरको आधार नै अझै यहाँ नभएको प्रविधि हो, त्यसको लागि थप पैसा तिर्नुको औचित्य आफैँ सोच्नुहोस्।
सबैभन्दा खट्किने कुरा भने Siri मा छ। iOS 27 को सबैभन्दा ठूलो परिवर्तन नै पूरै नयाँ बनाइएको Siri AI हो, जुन यो शरद ऋतुमा सार्वजनिक हुनेछ। तर Apple ले तोकेको Apple Intelligence भाषा सूचीमा नेपाली छैन — हिन्दी पनि छैन। सुरुमा अंग्रेजीमा मात्रै आउँछ, अनि बिस्तारै अरू भाषा थपिने कम्पनीले भनेको छ। नेपालीमा कहिले भन्ने कुनै संकेत छैन।
अनि निर्णय के?
अहिले नयाँ iPhone किन्ने योजना छ भने केही हप्ता पर्खनु नै समझदारी हुन्छ। नयाँ मोडेल आएपछि पुरानाको मूल्य घट्ने चलन नेपालमा पनि उस्तै हो।
तर यो पनि सम्झिनुहोस्: यसपालिको अपग्रेड सूची हेर्दा iPhone 18 Pro मा भएका धेरैजसो परिवर्तन भित्री हुन् — चिप, modem, डिस्प्लेको प्रविधि। iPhone 17 वा 16 चलाइरहेकालाई दैनिक प्रयोगमा ठूलो फरक महसुस हुने सम्भावना कम छ। मूल्य बढ्ने र फिचर थोरै मात्रै थपिने संयोजनमा, यसपालि नउफ्रिनु नै धेरैका लागि ठीक निर्णय हुन सक्छ।
साँच्चिकै चासोको कुरा त फोल्डेबल हो। Apple ले Samsung भन्दा सात वर्ष ढिलो गरेर के दिन्छ भन्ने प्रश्नको जवाफ सेप्टेम्बरमा आउँछ।